नेपाली ल्याउन ६७ उडान, कुन देशमा कुन कम्पनीको ,भाडादर कति हेनुहोस
आज जेठ २९ गतेबाट विदेशमा अलपत्र नेपालीको उद्वार तीब्र रुपमा सुरु भएको छ । विभिन्न मुलुकले कोरोना भाइरसको संक्रमण फैलन नदिन जारी गरेको लकडाउनका कारण रोकिएका नेपालीहरुको उद्धार सुरु भएको हो ।
विदेशमा अलपत्र नागरिकलाई राष्ट्रिय ध्वजावाहक नेपाल वायु सेवा निगम, हिमालय एयरलाइन्स र अरु विदेशी वायु सेवा प्रदायक कम्पनीले नेपाल ल्याउनेछन् । यसअघि कुन एयरलाइन्सलाई चार्टड उडान गर्न दिने भन्ने विवाद रहँदा नेपालीको उद्वार समयमै हुन सकेको थिएन । राष्ट्रिय ध्वजाबाहक भएको नाताले क्षमता अनुसार उद्वार उडान आफूले पाउनुपर्ने निगमको दाबी र नेपाली लगानीको अन्तराष्ट्रिय उडान भर्ने कम्पनी भएका कारण आफूलाई पनि छुटाउन नहुने हिमालयको अड्डीका कारण रोकिएको उद्वारको काम आजबाट सुरु भएपनि जेठ ३२ बाट भने दैनिक उद्वार हुनेछ ।
आज भने कुवेतबाट २ वटा उडान हुँदैछन् ।
असार ११ गतेसम्म हुने उद्वार उडानमा नेपाल एयरलाइन्सका वाइडबडी र न्यारोबडी दुवै जहाज र हिमालय एयरको न्यारोबडी जहाजले उडान भर्नेछन् । नागरिक उड्डयन प्राधिकरणका अनुसार नेपाल एयरलाइन्सको २४ र हिमालय एयरलाइन्सको १९ उडान गर्दा बाँकी २४ वटा उडान भने विदेशी विमान कम्पनीलाई दिईनेछ ।
कुन कम्पनीले कहाँबाट कहिले गर्नेछन् उडान:
बंगलादेशको ढाकाबाट जुन १४ मा हुने दुई वटा उडानमध्ये दुबै उडान विदेशी विमान कम्पनीले गर्नेछन् । जुन १५ मा नेपाल वायु सेवा निगमले माल्दिभ्सको माले र मलेशियाको क्वालालम्पुरबाट नेपालीहरु बोकेर काठमाडौँ आउनेछ । जुन १५ मा नै हिमालय एयरले साउदी अरब र सिंगापुरबा नेपालीहरुलाई काठमाडौँ ल्याउने छ ।
जुन १६ मा संयुक्त अरब इमिरेट्स (युएई) र कतारबाट निगमकै जहाजले उडान गर्दा कुवेत, श्रीलंका र मालेबाट हिमालयले उडान भर्नेछ ।
जुन १७ तारिखमा अष्ट्रेलिया, बैंकक र बहराइनबाट निगमले यात्रु ल्याउनेछ । सोही दिन हिमालयले बंगलादेश र कतारबाट नेपालीहरु लिएर काठमाडौँ आउनेछ । जुन १७ मा अमेरिकाबाट विदेशी विमान कम्पनीले नेपालीहरु लिएर काठमाडौँ आउने तालिका तय भएको छ ।
जुन १८ मा निगमको जहाजले साउदी र युएईबाट नेपालीहरु लिएर काठमाडौँ आउँदा हिमालयले क्वाललम्पुर र मस्कटबाट यात्रु बोकेर काठमाडौँ आउनेछ ।
जुन १९ मा जापान र कुवेतबाट नेपाल एयरलाइन्स र साउदी र नाइजेरीयाबाट हिमालयले उडान भर्ने छ ।
जुन २० मा नेपाल एयरलाइन्सले साइप्रस, क्वालालम्पुर र कतारबाट ३ वटा उडान भर्दैछ जुन २० मा नै हिमालयले युएई र बंगलादेशबाट नेपालीहरु ओसार्नेछ । २० जुनमै ईयूको एउटा उडान हुनेछ ।
जुन २१ तरिखमा दक्षिण कोरिया र मस्कट (ओमान)बाट निगमले उडान भर्नेछ । सोही दिन हिमालय एयरले कुवेत र क्वालालम्पुरबाट उडान गर्नेछ ।
जुन २२ मा निगमले अष्ट्रेलिया र बैंककबाट र हिमालयले पाकिस्तान र कतारबाट उडान गर्नेछ ।
जुन २३ मा निगमको जहाजले जापानको नारिता र मालेबाट उडान गर्दा हिमालयको उडान भने युएई र युगान्डाबाट हुनेछ ।
जुन २४ मा नेपाल एयरलाइन्सले साउदी र कुवेतबाट नेपाली ल्याउनेछ ।
जुन २५ तारिखमा निगमको वाइडबडी जहाजले जापानका नेपाली बोकेर काठमाडौँ आउँदा हिमालयले साइप्रस÷इजरायलबाट उडान गर्ने छ ।
हवाई भाडा दर यस्तो छ
काठमाडौँ – संस्कृति, पर्यटन तथा नागरिक उड्डयन मन्त्रालयले विदेशबाट हुने नेपालीको उद्धारका लागि हवाई भाडादर निर्धारण गरेको छ।
साउदी अरबको दमामका लागि पाँच सय ९० डलर, रियादका लागि ६ सय ३० डलर, जेदहाका लागि ७ सय ७० डलर, कुवेतका लागि पाँच सय ७० डलर, कतारको दोहाका लागि पाँच सय ४५ डलर, ओमानका लागि पाँच सय १० डलर, यूएईको दुबई, आबुधावी र शारजाहका लागि समान ५ सय डलर भाडा तोकिएको छ।
यस्तै मलेसियाको क्वालालाम्पुरका लागि पाँच सय २० र बहराइनका लागि पाँच सय ४५ डलर तोकिएको छ। नारिताका लागि ९ सय ३५ डलर, जोर्डनका लागि ८ सय १५, साइप्रसका लागि ८ सय ७५, लन्डनका लागि एक हजार ३ सय ४० र जर्मनीको फ्रान्कफर्टका लागि एक हजार २ सय ५५ डलर भाडा तोकिएको छ।
हङकङका लागि पाँच सय ५०, माल्दिभ्सका लागि पाँच सय ५, कम्बोडियाका लागि ४ सय, बैंककका लागि ३ सय ९०, नयाँ दिल्लीका लागि २ सय ५, बैंगलोरका लागि ३ सय ३५, मुम्बईका लागि ३ सय १०, बंगलादेशका लागि एक सय ६५ र सुडानको खार्तुनका लागि ९ सय ४० डलर तय भएको छ। पहिलो चरणमा हुने उद्धारका गन्तब्य मुलुकको भाडा निर्धारण गरिएको हो।
मन्त्रालयले उद्धार उडानमा प्रयोग हुने एयरलाइन्सको लागत खर्च उठने गरी भाडा तय गरेको दावी गरेको छ। पहिलो चरणमा ११ जुनदेखि जुन २५ गतेसम्मको लागि उद्धार गर्ने तयारी छ। सरकारले नेपाल एयरलाइन्स, हिमालय एयरलाइन्स र विदेशी एयरलाइन्सलाई चार्टर्ड फ्लाइटका लागि अनुमती दिएको छ।
