मेरिङदेन गाउँपालिकामा सामाजिक सुरक्षा भत्ता वितरण स्थगित

ताप्लेजुङ । जिल्लाको मेरिङ्देन गाउँपालिकामा विद्युत र इन्टरनेट सेवा नहुँदा सामाजिक सुरक्षा भत्ता वितरण अर्को सूचना प्रकाशन नहुन्जेल सम्म स्थगित भएको छ । गाउँपालिकाका प्रमूख प्रशासकीय अधिकृत भिम बहादुर सुब्बाद्धारा हस्ताक्षरित सूचनामा विद्युत र इन्टरनेटमा समस्या भएकाले अर्को सुचना जारी नहुन्जेल सामाजिक सुरक्षा भत्ता वितरण स्थगित गरिएको उल्लेख छ । देशभर परेको अविरल वर्षाले विद्युत,इन्टरनेट तथा सडक लगायत चौतर्फी क्षेत्रमा क्षति पुर्याएको छ । पालिकाले असोज १३ गतेदेखि नै भत्ता वितरणको तयारी गरेको थियो । विद्युत र इन्टरनेट समस्या समाधान भएमा र बैंकको सिस्टम चल्ने वित्तिकै अर्को सूचना प्रकाशन गरि भत्ता वितरण गर्ने गाउँपालिकाले जनाएको छ । दशैको मुखमा सामाजिक सुरक्षा भत्ता वितरण नहुँदा समस्या हुने भएकाले संम्भवत दशै अगावै वितरणको प्रयास गरिने गाउँपालिकाले जनाएको छ ।