उपत्यकामा ३१०७ सहित थप ५७४३ मा कोरोना पुष्टि
काठमाडौं। पछिल्लो २४ घण्टामा थप ५ हजार ७४३ जनामा कोरोना भाइरस सङ्क्रमणको पुष्टि भएको छ। देशभरका प्रयोगशालामा २० हजार ७४२ नमुना परीक्षण गर्दा उनीहरूमा संक्रमण पुष्टि भएको हो।
नयाँ संक्रमितमध्ये ३ हजार १०७ जना काठमाडौं उपत्यकाका छन्। जस मध्ये काठमाडौंमा २३९१, ललितपुरमा १७३ र भक्तपुरमा ५४३ रहेका छन्।
योसँगै मन्त्रालयले आयोजना गरेको नियमित कोरोना मिडिया ब्रिफिङमा प्रवक्ता डा. जागेश्वर गौतमले हालसम्म १ लाख ४४ हजार ८७२ सङ्क्रमितको संख्या पुगेको जनाए। यो सँगै देशभरी सक्रिय सङ्क्रमितको संख्या ४४ हजार ४७६ पुगेको छ।
त्यसैगरी २४ घण्टामा २ हजार ९९६ जना कोरोना सङ्क्रमणबाट निको भएर डिस्चार्ज भएका छन्। योसँगै निको हुनेको संख्या झण्डै एक लाख हाराहारीमा पुगेको छ। हालसम्म ९९ हजार ६०५ जना निको भएका छन्।
स्वास्थ्य मन्त्रालयका अनुसार हालसम्म पीसीआर विधिबाट १३ लाख ३४ हजार ८९७ परीक्षणहरू गरिएका छन्। हालसम्म क्वारेन्टाइनमा रहनेको संख्या ४ हजार ६५ जना रहेका छन्। त्यसैगरी २४ घण्टामा २६ जनाको कोरोना सङ्क्रमणबाट मृत्यु भएको छ।
यो सँगै नेपालमा मृत्यु हुनेको संख्या ७९१ पुगेको छ।
