गृहसचिवदेखि भारतीय राजदूतसम्म आइसोलेसनमा
काठमाडौं। संस्कृति, पर्यटन तथा नागरिक उड्डयनमन्त्री योगेश भट्टराईलाई हिजो कोरोना संक्रमण पुष्टि भएपछि गृहसचिवदेखि भारतीय राजदूतसम्म आइसोलेसनमा बसेका छन्। एकै कार्यक्रममा सामेल भएका गृहसचिव महेश्वर न्यौपानेसमेत आइसोलेसनमा बसेका हुन्। यस्तै शुक्रबारमात्रै मन्त्रीसँग भेटघाट गरेका भारतीय राजदूत विनयमोहन क्वात्राले सम्पूर्ण भेटघाट बन्द गरेका छन्।
उनी पनि आइसोलेसनमा छन्। मन्त्री भट्टराईलाई लक्षणसहितको कोरोना संक्रमण देखिएपछि अधिकांश व्यक्ति शंकाको घेरामा परेका छन्। गत शुक्रबार मन्त्री भट्टराईसँग मन्त्रालयमै औपचारिक भेटघाट गरेका क्वात्रा र दूतावासका अर्का एकजना कर्मचारीसमेत योगेशलाई कोरोना पुष्टि भएपछि क्वारेण्टिनमा बस्नुपर्ने भएको हो। यस सम्बन्धमा भारतीय दूतावासले औपचारिक सूचना सार्वजनिक गरिसकेको छैन।
गत बिहीबार भट्टराई ताप्लेजुङ्गस्थित ओलाङ्गचुङ्गगोला र संखुवासभास्थित किमाथाँका नाकामा सशस्त्र प्रहरी बलको बोर्डर आउट पोष्ट ९बीओपी० स्थापना कार्यक्रममा काठमाडौंबाट हेलिकोप्टरमा जाँदा गृहसचिव न्यौपाने पनि सँगै थिए। त्यसअघि पनि उनी विमानस्थल उद्घाटनको कार्यक्रममा पश्चिम नेपालका विभिन्न जिल्ला पुगेका थिए।
मन्त्री भट्टराईलाई हिजो कोरोना संक्रमण पुष्टि भएपछि न्यौपाने पनि आइसोलेसनमा बसेका हुन्। उक्त कार्यक्रममा मन्त्रीसँगै सशस्त्र प्रहरीका धेरैजना र स्थानीय नेता तथा कार्यकर्तासमेत सहभागी थिए।
यस्तै उपत्यकाका डिआइजी विश्वराज पोखरेल पनि एकान्तबासमा छन्। मन्त्रीसँगै विभिन्न कार्यक्रममा सामेल पोखरेल मन्त्रीमा कोरोना देखिएपछि आइसोलेसनमा बस्न पुगेका हुन्।
