अस्पतालबाट डिस्चार्ज भए ट्रम्प
एजेन्सी। कोरोना संक्रमण पुष्टि भएर अस्पताल भर्ना भएको तीन दिनपछि नै अमेरिकी राष्ट्रपति डोनाल्ड ट्रम्प अस्पतालबाट डिस्चार्ज भएका छन्। डिस्चार्ज हुने बित्तिकै उनले चाँडै चुनावी अभियानमा फर्कने वाचासमेत गरेका छन्। अस्पतालबाट डिस्चार्ज भए पनि ह्वाइट हाउसमा उनको कोडिभको उपचार जारी रहनेछ।
अस्पतालबाट मरिन वान हेलिकप्टरमा उनी ह्वाइट हाउस पुगेका थिए। ‘म निकै राम्रो महसुस गरिरहेको छु,’ ट्रम्पले यसअघि ट्वीट गरेका थिए, ‘कोभिडसँग नडराऊ। यसलाई तिम्रो जीवनमा हावी हुन नदेऊ।’ अमेरिकामा ७४ लाखभन्दा बढीमा कोरोना भाइरसको संक्रमण पुष्टि भइसकेको छ भने २ लाख १० हजारभन्दा बढीको ज्यान गइसकेको छ।
डाक्टर तथा ह्वाइट हाउसबाट परस्पर विरोधी वक्तव्य आएपछि ट्रम्पको स्वास्थ्य अवस्थामा बारे अझै अन्यौलता रहेको छ। त्यस्तै, ह्वाइट हाउसमा सङ्क्रमणको फैलावटको अवस्था पनि अज्ञात छ।
वाल्टर रिड नेशनल मिलिटरी मेडिकल सेन्टरबाट बाहिरिएका ट्रम्पले सबैलाई धन्यवाद दिएका थिए। उनले पत्रकारहरूको प्रश्नको उत्तर भने दिन चाहेनन्।
ह्वाइट हाउस पुगेर उनी एक्लै बरन्डामा देखिएका थिए।
