नेपालमा थप २ हजार ७२२ मा कोरोना पुष्टि, सक्रिय सङ्क्रमितको संख्या २१ हजार २३४
काठमाडौं। बितेको २४ घण्टामा देशभर थप २ हजार ७२२ जनामा कोरोना भाइरस संक्रमण पुष्टि भएको छ। सोमबारको नियमित प्रेस ब्रिफिङमा स्वास्थ्य मन्त्रालयका प्रवक्ता डा जागेश्वर गौतमले यससँगै देशभर सक्रिय सङ्क्रमितको संख्या २१ हजार २३४ पुगेको जानकारी दिए।
यस्तै आज देशभर ९ हजार ४७४ संस्थागत आइसोलेसन र ११ हजार ७६० जना होम आइसोलेसनमा रहेका छन्। यसैगरी बितेको २४ घण्टामा काठमाडौं उपत्यकामा १६ सय ३८ जनामा कोरोना भाइरस संक्रमण पुष्टि भएको छ। मन्त्रालयका अनुसार काठमाडौं १२८०, ललितपुरमा १६२, र भक्तपुरमा १९६ गरी कुल १६३८ जनामा कोरोना संक्रमण पुष्टि भएको हो।
उनका अनुसार बितेको २४ घण्टामा थप ३३०७ जना निको भएका छन्। यससँगै निको हुनेको कुल संख्या ६० हजार ६९६ पुगेको गौतमले बताए। यस्तै आज १४ हजार ७३९ जनाको पीसीआर भएको छ।
