नेपालमा थप ९०२ मा कोरोना पुष्टि, सङ्क्रमित संख्या ४८ हजार नाघ्योे
काठमाडौं। पछिल्लो २४ घण्टामा देशभर थप ९०२ जनामा कोरोना भाइरस संक्रमण पुष्टि भएको छ। मङ्गलबारको नियमित प्रेस ब्रिफिङमा स्वास्थ्य मन्त्रालयका प्रवक्ता डा जागेश्वर गौतमले हालसम्म कुल सङ्क्रमितको संख्या ४८ हजार १३८ पुगेको जानकारी दिए।
यस्तै पछिल्लो २४ घण्टामा २ हजार २८७ जना कोरोना संक्रमण मुक्त भएसँगै निको हुनेको कुल संख्या ३२ हजार ९६४ पुगेको छ। यसैगरी देशभर सक्रिय सङ्क्रमितको संख्या १४ हजार ८६८ रहेको छ।
जसमा संस्थागत आइसोलेसनमा ८ हजार ५३ रहेका छन् भने होम आइसोलेसनमा ६ हजार ८१५ जना रहेका छन् । यस्तै आज १० हजार ६११ जनाको पीसीआर परीक्षण भएको छ।
यसैगरी पछिल्लो २४ घण्टामा थप ६ जनाको कोरोनाबाट मृत्यु भएको छ। यससँगै मृतकको कुल संख्या ३०६ पुगेको छ।
