उपत्यकामा १५९ सहित थप ६८१ मा कोरोना पुष्टि
काठमाडौँ। नेपालमा पछिल्लो २४ घन्टामा थप ६८१ मा कोरोना भाइरस सङ्क्रमणको पुष्टि भएको छ। स्वास्थ्य तथा जनसङ्ख्या मन्त्रालयले गरेका नियमित पत्रकार सम्मेलनमा मन्त्रालयका प्रवक्ता डा. जागेश्वर गौतमले आज ६८१ जनामा सङ्क्रमित फेला परेको जानकारी दिए।
विभिन्न प्रयोगशालामा ११ हजार ५२२ जनाको गरिएको पिसीआर परीक्षणमा ६८१ जनामा सङ्क्रमण पुष्टि भएको हो। यसअघि मंगलबार एकै दिन एक हजार १६ जनामा सङ्क्रमण देखिएको थियो।
आज देखिएका सङ्क्रमितसँगै नेपालमा कूल सङ्क्रमितको संख्या २८ हजार ९३८ जना पुगेको छ। मन्त्रालयका प्रवक्ता डा गौतमका अनुसार सक्रिय सङ्क्रमित ११ हजार ११८ जना रहेका छन्।
यसैगरी आज १२० जना सङ्क्रमित जितेर घर फर्किएका छन्। अहिलेसम्म १७ हजार ७०० जना सङ्क्रमित निको भई घर फर्किसकेको उनले बताए। मुलुकभरि क्वारेन्टाइनमा १३ हजार ५७१ जना रहेका छन्।
यसैगरी पछिल्लो २४ घण्टामा कोरोना सङ्क्रमणबाट थप ६ जनाको मृत्यु भएको मन्त्रालयले जनाएको छ। अहिलेसम्म १२० जना सङ्क्रमणबाट मृत्यु भएका छन्।
साथै उपत्यकामा पछिल्लो २४ घण्टामा १५९ जनामा कोरोना संक्रमण पुष्टि भएको छ। स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमका अनुसा पछिल्लो २४ घण्टामा काठमाडौंमा १३४ जनामा कोरोना पुष्टि भएको छ।
त्यसैगरी ललितपुरमा १७ जना र भक्तपुरमा ८ जनामा कोरोना संक्रमण पुष्टि भएको हो।
