भरतमा एकैदिन ६५ हजार बढिमा कोरोना पुष्टि, सङ्क्रमित सङ्ख्या २१ लाख ५२ हजार नाघ्यो
काठमाडौँ। भारतमा पछिल्लो २४ घण्टामा विश्वमै सबैभन्दा धेरै कोरोना सङ्क्रमित देखिएका छन्। भारतमा एकै दिन ६५ हजार भन्दा धेरैमा कोरोना सङ्क्रमण पुष्टि भएको छ।
शनिबार भारतमा ६५ हजार एक सय ५६ जनामा सङ्क्रमण पुष्टि भएको हो। यो सङ्ख्या भारतमा कोरोना सङ्क्रमण देखिएयताकै सबैभन्दा बढी भएको अन्तर्राष्ट्रिय सञ्चारमाध्यमहरूले जनाएका छन्।
सङ्क्रमणको कारण भारतमा शनिबार आठ सय ७५ जनाको मृत्यु भएको वर्ल्डओमिटरले जनाएको छ। भारतमा अहिलेसम्म सङ्क्रमितको सङ्ख्या २१ लाख ५२ हजार २० पुगेको छ। भने मृतकको सङ्ख्या ४३ हजार चार सय ५३ पुगेको छ।
पछिल्लो २४ घण्टामा विश्वभर दुई लाख ६१ हजार दुई सय ९१ जनामा कोरोना सङ्क्रमण पुष्टि भएको छ भने पाँच हजार ६ सय १ जनाले ज्यान गुमाएका छन्।
